លោក ប្ល៊ីនខិន បាននិយាយនៅពេលលោកធ្វើជាប្រធានកិច្ចប្រជុំក្រុមប្រឹក្សាសន្តិសុខអង្គការសហប្រជាជាតិ ស្តីពីទុរភិក្ស និងអសន្តិសុខស្បៀងអាហារ បណ្តាលមកពីជម្លោះរុស្ស៊ី និង អ៊ុយក្រែន ថា សមាជិកអង្គការសហប្រជាជាតិទាំងអស់គួរតែប្រាប់ទីក្រុងម៉ូស្គូថា«ល្មមគ្រប់គ្រាន់ហើយសម្រាប់រុស្ស៊ី»។
លោក ប្ល៊ីនខិន បានបញ្ជាក់ប្រាប់ក្រុមប្រឹក្សាសន្តិសុខសហប្រជាជាតិដែលមានសមាជិក ១៥រូបថា «រុស្ស៊ីគ្រប់គ្រាន់ហើយក្នុងការប្រើសមុទ្រខ្មៅធ្វើជាការគំរាមកំហែងដើម្បីទាមទារអ្វីមួយតាមខ្លួនចង់បាន និងល្មមគ្រប់គ្រាន់ហើយក្នុងការចាត់ទុកមនុស្សងាយរងគ្រោះបំផុតនៅក្នុងពិភពលោកធ្វើជាអានុភាពរបស់ខ្លួន។
លោក ប្ល៊ីនខិន បានប្រកាសថាប្រទេសជិត៩០បានគាំទ្រសេចក្តីថ្លែងការណ៍ខ្លីមួយរបស់សហរដ្ឋអាមេរិកដោយពួកគេបានប្តេជ្ញាចិត្តថា«នឹងចាត់វិធានការដើម្បីបញ្ចប់ការប្រើស្បៀងអាហារធ្វើជាអាវុធនៅក្នុងសង្គ្រាម និងការអត់ឃ្លានរបស់ជនស៊ីវិលជាយុទ្ធសាស្ត្រនៃការធ្វើសង្គ្រាម»។
អត្ថបទគួរអាន
អាមេរិក សហភាពអឺរ៉ុប និងប្រទេសផ្សេងទៀតបានចោទរុស្ស៊ីថាបានប្រើស្បៀងធ្វើជាអាវុធនៃសង្គ្រាមធ្វើឱ្យវិបត្តិស្បៀងអាហារពិភពលោកកាន់តែឡើងថ្លៃនៅពេលរុស្ស៊ីបានឈ្លានពានអ៊ុយក្រែនក្នុងខែកុម្ភៈ ឆ្នាំ២០២២ ប៉ុន្តែអាមេរិកមិនបានបញ្ចេញចំឈ្មោះប្រទេសណាមួយនោះទេ។
លោក ប្ល៊ីនខិន បានបន្ថែមថា សហរដ្ឋអាមេរិកនឹងផ្តល់មូលនិធិថ្មីចំនួន៣៦២លានដុល្លារដើម្បី«ដោះស្រាយអ្នកប្រឈមនឹងបញ្ហាអសន្តិសុខស្បៀងអាហារ និងដើម្បីបង្កើនភាពរឹងមាំស្បៀងអាហារ»នៅក្នុងប្រទេសអាហ្វ្រិកចំនួន១១ និងប្រទេសហៃទី។
ទន្ទឹមនេះដែរ ក្រុមប្រឹក្សាសន្តិសុខបានអនុម័តសេចក្ដីថ្លែងការណ៍ផ្លូវការមួយពីថ្ងៃព្រហស្បតិ៍ថា ក្រុមប្រឹក្សាសន្តិសុខសូមថ្កោលទោសយ៉ាងខ្លាំងចំពោះការបដិសេធចែកចាយជំនួយមនុស្សធម៌ដោយខុសច្បាប់ និងការប្រើការស្រេកឃ្លានអាហាររបស់ជនស៊ីវិលធ្វើជាវិធីសាស្ត្រនៃការធ្វើសង្គ្រាមព្រោះវាជាវិធីមួយដែលត្រូវបានហាមឃាត់នៅក្នុងច្បាប់មនុស្សធម៌អន្តរជាតិ៕
អត្ថបទ៖ សុខ ជា
