ធនាគាររដ្ឋនៃប្រទេសវៀតណាម មានការព្រួយបារម្ភអំពីការរំពឹងទុកនិងការរត់ពន្ធមាស ហើយចង់ឲ្យ រដ្ឋាភិបាលពង្រឹងការត្រួតពិនិត្យទីផ្សារ ខណៈដែលតម្លៃមាសនៅក្នុងប្រទេសជាង១០០លាននាក់មួយនេះមានតម្លៃថ្លៃ។ បើតាមប្រព័ន្ធឃោសនារបស់រដ្ឋ ធនាគារកណ្តាលវៀតណាម បានអំពាវនាវឱ្យស្ថាប័នពាក់ព័ន្ធ រួមមាន ក្រសួងឧស្សាហកម្ម និងពាណិជ្ជកម្ម, ក្រសួងសន្តិសុខសាធារណៈ និងក្រសួងហិរញ្ញវត្ថុ ស្វែងរកករណីខុសច្បាប់ទាក់ទងនឹងសកម្មភាព រំលោភលើការជួញដូរមាសនៅក្នុងប្រទេស។
ធនាគារកណ្តាលវៀតណាម បានជំរុញឱ្យស្ថាប័នពាក់ព័ន្ធលើកកម្ពស់យន្តការ ពិនិត្យមើលវិក័យបត្រប្រតិបត្តិការ និងហាមឃាត់សកម្មភាពទិញដូ ឫជូញដូមាសខុសច្បាប់។ ធនាគារកណ្តាលវៀតណាមបាននិយាយថា ខ្លួនបានរៀបចំរួចហើយនូវយន្តការ ដើម្បីបង្កើនការផ្គត់ផ្គង់មាសតាមការធ្វើពាណិជ្ជកម្មស្របច្បាប់ទៅកាន់ទីផ្សារ។
ចាប់តាំងពីឆ្នាំ២០១២មក អាជ្ញាធរវៀតណាម បានប្រគល់សិទ្ធិផ្តាច់មុខ ឲ្យតែធនាគារកណ្តាល ប៉ុណ្ណោះ ដែលត្រូវបានអនុញ្ញាតឱ្យប្រតិបត្តិការលើការធ្វើពាណិជ្ជកម្មមាស ប៉ុន្តែនៅក្នុងរយៈពេលមួយទស្សវត្សរ៍ចុងក្រោយនេះ ធនាគារកណ្តាលនៅមិនទាន់បានបញ្ចេញមាសចូលទៅក្នុងផ្សារនៅឡើយទេ ដែលនាំឱ្យតម្លៃមាសមានការកើនឡើងម្តងហើយម្តងទៀត។ តម្លៃមាសដុំនៅវៀតណាមបានកើនឡើង០,៣៩% ដល់ជាង២ពាន់១រយដុល្លារក្នុងមួយតម្លឹង។ តម្លៃមាសនៅលើទីផ្សារអន្តរជាតិនៅព្រឹកថ្ងៃអាទិត្យ ទី២១ ខែមករា ឆ្នាំ២០២៤ មានតម្លៃ២ពាន់៣០ ដុល្លារនៅក្នុងមួយអោនកើនឡើងប្រមាណជា០,៣០%។
គួររំលឹកថា កាលពីខែមិថុនា ឆ្នាំ២០២៣កន្លងទៅ អាជ្ញាធរវៀតណាមធ្លាប់បានអះអាងថា ខ្លួនបានរឹបអូសមាសសរុបចំនួនដល់ទៅ១៩គីឡូក្រាម ដែលត្រូវបានជនខិលខូចលួចរត់ពន្ធពីកម្ពុជាចូលទៅវៀតណាមតាមច្រកនៃខេត្តអានយ៉ាង៕
ដោយៈ សរ សុជាតិ
