ការនាំចេញទូរស័ព្ទsmartphoneសរុបនៅប្រទេសចិនអាចបានធ្លាក់ចុះ១០% ក្នុងឆ្នាំ២០២២មកនៅត្រឹម ២៨៥ លានគ្រឿង ហើយឧបសគ្គនឹងនៅតែមានច្រើនទៀតនៅឆ្នាំ២០២៣នេះ។ នេះបើយោងតាមលោក Will Wong អ្នកវិភាគនៅក្រុមហ៊ុនស្រាវជ្រាវឧស្សាហកម្ម IDC ដែលមានមូលដ្ឋាននៅសិង្ហបុរី។
លោក Wong បានពន្យល់ថា ការទិញទូរស័ព្ទថ្មី នឹងមិនមែនជាអាទិភាពសម្រាប់មនុស្សនៅឆ្នាំនេះទេ ដោយសារពួកគេជ្រើសរើសធ្វើដំណើរទៅក្រៅប្រទេសកាន់តែច្រើនស្របពេលដែលវិធានការទប់ស្កាត់ជំងឺកូវីដ១៩ត្រូវបានដកចេញវិញ ខណៈដែលអ្នកប្រើប្រាស់មានការត្បិតត្បៀតចំណាយរបស់ពួកគេ។ ទោះយ៉ាងណា ទីផ្សារទូរស័ព្ទរបស់ចិនត្រូវគេរំពឹងថានឹងមានកំណើនវិញនៅក្នុងឆ្នាំ២០២៤។
ទិន្នន័យទីផ្សារចុងក្រោយបង្អស់របស់ប្រទេសចិនបានបង្ហាញទៀតថា ខែវិច្ឆិកាគឺជារដូវកាលពេញនិយមជាងគេសម្រាប់ការទិញទូរស័ព្ទដោយសារមានការដើរទិញឥវ៉ាន់ច្រើននៅថ្ងៃ លក់បញ្ចុះតម្លៃ Singles' Day ប៉ុន្តែវាមិនបានច្រើនដូចជាការគិតនោះទេ។ ការនាំចេញទូរស័ព្ទឆ្លាតវៃរបស់ប្រទេសនេះនៅក្នុងខែវិច្ឆិកាដដែល បានធ្លាក់ចុះ ៣៦%បើធៀបនឹងពេលដូចគ្នាកាលពីមួយឆ្នាំមុន ក្នុងរង្វង់ត្រឹម ២២លានគ្រឿង។
អត្ថបទគួរអាន
នៅក្នុងរយៈពេល ១១ ខែដំបូងកាលពីឆ្នាំមុន ការលក់បានធ្លាក់ចុះ ២៣.៦% បើធៀបនឹងរយៈពេលដូចគ្នាកាលពីឆ្នាំ២០២១។ តួលេខនៃការលក់ទូរស័ព្ទនៅខែវិច្ឆិកាឆ្នាំ២០២២គឺជា«ការលក់ដ៏អាក្រក់បំផុតក្នុងខែវិច្ឆិកាចាប់តាំងពីឆ្នាំ២០១៥»មក។
សូមជម្រាបថា ម៉ូដែលទូរស័ព្ទលំដាប់កំពូលទាំង៥ ដែលនាំមុខគេនៅចិន គឺមានរបស់ក្រុមហ៊ុន Apple លក់បានជិត៥លានគ្រឿង តែចំនួននេះបានជួបប្រទះនឹងការធ្លាក់ចុះយ៉ាងខ្លាំង។ ក្រុមហ៊ុន Vivo ដែលជាប់ចំណាត់ថ្នាក់ទី ៥ ក្នុងខែវិច្ឆិកានោះ គឺជាក្រុមហ៊ុនដែលរងគ្រោះខ្លាំងបំផុត ជាមួយការធ្លាក់ចុះ ៣៦% មកនៅត្រឹមចំនួនដែលលក់បានជាង ២.៣គ្រឿង។
គួរបញ្ជាក់ថា ការលក់សរុបពេញមួយឆ្នាំ២០២២នឹងមានចន្លោះពី ២៥០ លានទៅ ២៦០ លានគ្រឿងដែលនេះជាការលក់ប្រចាំឆ្នាំដ៏អាក្រក់បំផុតមិនធ្លាប់មានចាប់តាំងពីឆ្នាំ២០១៥មក៕
អត្ថបទ ៖ សុខ ជា
