លោក ស៊ី ជីនពីងប្រាប់ឲ្យអាជ្ញាធរហុងកុងយកចិត្តទុកដាក់ចំពោះរលកឆ្លងកូវីដ១៩លើកទី៥

លោក ស៊ី ជីនពីង បានលើកឡើងថា រដ្ឋបាលទីក្រុងហុងកុង គួរតែចាត់វិធានការចាំបាច់ ដើម្បីការពារអាយុជីវិត សុវត្ថិភាពរបស់ប្រជាជន និងធានាស្ថិរភាពសង្គមទាំងមូល។ 

បើយោងតាម ការសែតចិន បាននិយាយថា រដ្ឋាភិបាលមជ្ឈិមរបស់ចិនកំពុងបង្កើតយន្តការ ដើម្បីធានាបាននូវការប្រយុទ្ធប្រឆាំងការរាតត្បាតប្រកបដោយប្រសិទ្ធភាព។ យន្តការទាំងនោះរួមមាន ការធ្វើតេស្ដ ការព្យាបាល ការដាក់ឲ្យនៅដាច់ដោយឡែក និងកន្លែងវេជ្ជសាស្ត្រ ធានាការផ្គត់ផ្គង់របស់ចាំបាច់ដូចជាអាហារស្រស់ និងការបញ្ជូនអ្នកជំនាញខាងមេរោគឆ្លងទៅហុងកុង ដើម្បីផ្តល់ការណែនាំបន្ថែមផងដែរ។កិច្ចការទាំងអស់នេះ នឹងត្រូវដឹកនាំដោយការិយាល័យកិច្ចការហុងកុង និងម៉ាកាវ នៃក្រុមប្រឹក្សារដ្ឋ និងគណៈកម្មការសុខភាពជាតិរបស់ចិន ហើយនឹងមានការចូលរួមពីអាជ្ញាធរ និងអ្នកជំនាញនៅទីក្រុងប៉េកាំង ក៏ដូចជាខេត្តក្វាងទុង និងរដ្ឋាភិបាលក្នុងតំបន់ផងដែរ។

គួរបញ្ចាក់ថា ការលើកឡើងរបស់លោក  ស៊ី ជីនពីង ឲ្យហុងកុងបន្ដការយកចិត្ដទុកដាក់ខ្ពស់លើបញ្ហាកូវីដ១៩នេះ គឺបន្ទាប់ពីការកើតមានការផ្ទុះឡើងនូវរលកនៃការឆ្លងទី៥ នៅទីក្រុងហុងកុងកាន់តែខ្លាំងឡើង ដោយករណីឆ្លងមានដល់ជាង ១,៦០០នាក់ ក្នុងមួយថ្ងៃ។

រលកទីប្រាំនៃការឆ្លងវីរុសកូវីដ-១៩នៅហុងកុង បានលេចចេញជាលើកដំបូងកាលពីចុងខែធ្នូ ហើយហុងកុងបានបញ្ជាក់ពីករណីឆ្លងសរុបជាង ១ ម៉ឺននាក់ ចាប់តាំងពីពេលនោះមក។ ស្ថានភាពជំងឺរាតត្បាតកាន់តែអាក្រក់របស់ហុងកុងមានភាពផ្ទុយស្រឡះពីប្រទេសចិនដីគោក ដែលមានតែករណីឆ្លងត្រឹមតែ ៨០ ករណីប៉ុណ្ណោះក្នុងមួយថ្ងៃ។

អត្ថបទ វ៉ាន់ ស្រីរ័ត្ន