តាមរយៈភាពជាដៃគូនេះ អនុញ្ញាតឱ្យទេសចរចិនអាចធ្វើការទូទាត់តាមរយៈ KHQR នៅគ្រប់កន្លែងនៅកម្ពុជា ហើយទេសចរកម្ពុជាទៅប្រទេសចិនក៏អាចប្រើ KHQR ដើម្បីទូទាត់លើគ្រប់ QR របស់ក្រុមហ៊ុន Union Pay រួមទាំងក្រុមហ៊ុន Wechat និង AliPay ផងដែរ។ អ្នកជំនាញក្នុងវិស័យទេសចរណ៍ អះអាងថា តាមរយៈយន្តការនេះ វារួមចំណែកជួយបង្កភាពងាយស្រួលមួយកម្រិតទៀតសម្រាប់ការទូទាត់របស់ភ្ញៀវទេសចរនៃប្រទេសទាំងពីរ ពិសេសអាចបង្កើនការចំណាយរបស់ភ្ញៀវទេសចរចិនដែលចូលមកកម្ពុជាផងដែរ។
ធនាគារជាតិនៃកម្ពុជាបានគូសបញ្ជាក់ថា ការចុះអនុស្សរណៈនៃការយោគយល់គ្នា រវាងធនាគារជាតិនៃកម្ពុជាជាមួយក្រុមហ៊ុន UnionPay International នេះ ធ្វើឡើងក្នុងគោលបំណងផ្តល់នូវក្របខ័ណ្ឌជាក់លាក់ ដើម្បីលើកកម្ពស់ដល់ប្រតិបត្តិការទូទាត់ឆ្លងដែនរវាងកម្ពុជា-ចិនតាមរយៈ KHQR នៃប្រព័ន្ធបាគងជាមួយនឹង QR Code របស់ក្រុមហ៊ុន UnionPay International។ តាមរយៈភាពជាដៃគូនេះ ភ្ញៀវទេសចរចិនដែលមកកម្សាន្តនៅកម្ពុជាអាចប្រើប្រាស់សេវាទូទាត់របស់ UnionPay ដើម្បីស្កេន KHQR Code សម្រាប់ទូទាត់ថ្លៃសេវាកម្ម និងទំនិញនានានៅទូទាំងប្រទេសកម្ពុជា។ ទន្ទឹមនេះ ប្រជាជនកម្ពុជាដែលប្រើប្រាស់ប្រព័ន្ធបាគង និងមានគណនីធនាគារជាប្រាក់រៀល ក៏អាចស្កេន QR Code របស់ពាណិជ្ជករ UnionPay ក្នុងប្រទេសចិន និងទូទាំងពិភពលោកផងដែរ។ កិច្ចសហប្រតិបត្តិការនេះមិនត្រឹមតែជួយសម្រួលដល់ការទូទាត់សងប្រាក់រវាងប្រទេសទាំងពីរប៉ុណ្ណោះទេ ថែមទាំងជាផ្នែកមួយជួយលើកកម្ពស់ការប្រើប្រាស់ប្រាក់រៀល និងទាក់ទាញភ្ញៀវទេសចរផងដែរ។
អត្ថបទគួរអាន
ពាក់ព័ន្ធនឹងបញ្ហានេះលោកជំទាវ ឆាយ ស៊ីវលីន ប្រធានសមាគមទេសចរណ៍កម្ពុជាបានគូសបញ្ជាក់ថា កន្លងមកភ្ញៀវទេសចរចិនដែលចូលមកកម្ពុជានៅពេលត្រូវការចំណាយ ពួកគេតែងតែសួររកការទូទាត់ឆ្លងដែនតាមរយៈប្រព័ន្ធ QR Codeនេះ ប៉ុន្តែសម្រាប់កម្ពុជាការទូទាត់តាមរយៈប្រព័ន្ធ QR Codeនេះ ហាក់នៅមានកម្រិតនៅឡើយ។ ដូច្នេះតាមរយៈកិច្ចសហការរវាងធនាគារជាតិ ជាមួយក្រុមហ៊ុន UnionPay International នេះ វានឹងធ្វើឱ្យទំនាក់ទំនងរវាងកម្ពុជា-ចិនកាន់តែមានភាពជិតស្និទ្ធ និងងាយស្រួលទាំងវិស័យភ្ញៀវទេសចរ ពាណិជ្ជកម្ម និងវិនិយោគបន្ថែមទៀត។ សម្រាប់វិស័យទេសចរណ៍ទៀតសោត អ្នកជំនាញរូបនេះអះអាងថា នៅពេលដែលអាចទូទាត់ឆ្លងដែនតាមរយៈ QR Code បែបនេះ វាក៏អាចជម្រុញឱ្យការចាយវាយរបស់ភ្ញៀវទេសចរចិនមានការកើនឡើងបន្ថែមទៀតផងដែរ តួយ៉ាងដូចជាការចង់ពន្យាពេលទស្សកិច្ចនៅកម្ពុជា គឺពួកគេមិនបារម្ភរឿងការគ្មានប្រព័ន្ធទូទាត់ចំណាយ ហើយពួកគេក៏មិនចាំបាច់ដាក់ប្រាក់តាមខ្លួនច្រើននោះដែរ។
ជាមួយគ្នានេះលោកជំទាវ ឆាយ ស៊ីវលីន ជំរុញឲ្យគ្រប់ទីតាំងទាំងអស់ដែលបម្រើដល់ទីផ្សារជនជាតិចិន គឺត្រូវចូលរួមគាំទ្រ និងដាក់ឱ្យប្រើប្រាស់ការស្កេន QR Code ឆ្លងដែននេះឱ្យបានច្រើនផងដែរ ទើបអាចឱ្យភ្ញៀវទេសចរទាំងនោះ អាចប្រើប្រាស់បានលឿន និងទាន់ពេលវេលាដោយមិនចាំបាច់ទៅដល់ធនាគារផ្ទាល់៕
