ចិនដាក់បម្រាមមិនឱ្យប្រើបន្ទះឈីបផលិតដោយក្រុមហ៊ុនអាម៉េរិក នៅក្នុងកុំព្យូទ័ររបស់រដ្ឋាភិបាល

សារព័ត៌មាននេះ បានបញ្ជាក់ថា សេចក្ដីណែនាំនេះ ក៏បញ្ជាមិនឱ្យប្រើប្រាស់ប្រព័ន្ធប្រតិបត្តិការ Windows របស់ក្រុមហ៊ុនអាម៉េរិក Microsoft និងសូហ្វវែរដាតាបេស (Database Software) ដែលផលិតដោយបរទេស ហើយងាកមកប្រើប្រាស់ផលិតផលក្នុងស្រុកវិញ។សារព័ត៌មាននេះ បានបន្ថែមថា បណ្ដាទីភ្នាក់ងាររដ្ឋាភិបាលត្រូវបានតម្រូវឱ្យប្រើប្រាស់តែ CPU ជាផ្នែកដ៏សំខាន់នៃកុំព្យូទ័រ និងដែលមាននាទីបំប្លែង និងគណនាទៅលើរាល់ទិន្នន័យ និងប្រព័ន្ធដំណើរការ (Operating System) ដែលមានសុវត្ថិភាព និងអាចទុកចិត្តបានប៉ុណ្ណោះ។

ក្រសួងឧស្សាហកម្មរបស់ប្រទេសចិន កាលពីចុងខែធ្នូ ឆ្នាំ២០២៣ បានចេញសេចក្តីថ្លែងការណ៍មួយអមដោយបញ្ជីរាយនាមចំនួន៣ ដាច់ដោយឡែកពីគ្នាសម្រាប់ CPU ប្រព័ន្ធប្រតិបត្តិការ (Operating System) និងដាតាបេស (Database) ដែលត្រូវបានចាត់ទុកថា មានសុវត្ថិភាព និងអាចទុកចិត្តបាន ដែលទាំងអស់នោះសុទ្ធតែផលិតដោយក្រុមហ៊ុនចិន។

ទោះជាយ៉ាងណា ការិយាល័យព័ត៌មានក្រុមប្រឹក្សារដ្ឋ (State Council Information Office) ទទួលបន្ទុកឆ្លើយសំណួរពីប្រព័ន្ធផ្សព្វផ្សាយសម្រាប់គណៈរដ្ឋមន្ត្រីរបស់ប្រទេសចិន មិនបានឆ្លើយតបសំណើសុំការបំភ្លឺជុំវិញបញ្ហានេះទេ។ ហើយទន្ទឹមនេះ បណ្ដាក្រុមហ៊ុនអាម៉េរិក រួមមានក្រុមហ៊ុន Intel និងក្រុមហ៊ុន AMD ក៏មិនបានឆ្លើយតបសំណើរបស់ទីភ្នាក់ងារព័ត៌មាន ដែលសុំឱ្យឆ្លើយបំភ្លឺជុំវិញបញ្ហានេះដែរ។

សហរដ្ឋអាម៉េរិក បាននិងកំពុងដាក់គោលដៅជំរុញការផលិតបន្ទះឈីបក្នុងស្រុក និងកាត់បន្ថយការពឹងផ្អែកលើប្រទេសចិន និងកោះតៃវ៉ាន់ ជាមួយនឹងការបង្កើតច្បាប់ស្តីពីបន្ទះឈីប និងវិទ្យាសាស្ត្រឆ្នាំ២០២២ (2022 CHIPS and Science Act) ក្រោមរដ្ឋបាលដឹកនាំរបស់ប្រធានាធិបតី ចូ បៃឌិន។

ច្បាប់នេះត្រូវបានបង្កើតឡើង ដើម្បីជំរុញការផលិតបន្ទះឈីបរបស់សហរដ្ឋអាម៉េរិក និងមានជំនួយហិរញ្ញវត្ថុសម្រាប់ផលិតកម្មក្នុងស្រុក ជាមួយនឹងការឧបត្ថម្ភធនសម្រាប់ការផលិតបន្ទះឈីបកម្រិតខ្ពស់ទៀតផង៕

ដោយ: តែម សុខុម