រដ្ឋាភិបាលអ៊ីរ៉ាក់ នឹងឈប់ឱ្យមានការដកជាលុយដុល្លារនៅតាមធនាគារ

លោក ម៉ាហ្សិន អះម៉េត (Mazen Ahmed) អគ្គនាយកនៃការវិនិយោគ និងផ្ទេរប្រាក់នៅធនាគារកណ្តាលអ៊ីរ៉ាក់ (CBI) បានបញ្ជាក់ថា វិធានការនេះមានបំណងលុបបំបាត់ការប្រើប្រាស់ខុសច្បាប់នូវសាច់ប្រាក់៥០%នៃទឹកប្រាក់សរុបចំនួន១០ពាន់លានដុល្លារ ដែលអ៊ីរ៉ាក់ បាននាំចូលជាសាច់ប្រាក់ពីធនាគារកណ្តាលក្រុងញូវយ៉កសហរដ្ឋអាមេរិកជារៀងរាល់ឆ្នាំ។

វិធានការនេះក៏ជាផ្នែកមួយនៃការជំរុញយ៉ាងទូលំទូលាយនូវសេដ្ឋកិច្ចមួយ ដែលមិនចាំបាច់ពឹងផ្អែកលើប្រាក់ដុល្លារ ខណៈដែលពលរដ្ឋអ៊ីរ៉ាក់ហាក់ចាយប្រាក់ដុល្លារច្រើនជាងប្រាក់ក្នុងស្រុកកាន់តែខ្លាំងឡើង ក្រោយពីមានការលុកលុយរបស់អាមេរិកទៅលើអ៊ីរ៉ាក់កាលពីឆ្នាំ២០០៣។

លោក អះម៉េត បាននិយាយថា អ្នកដាក់ប្រាក់ដុល្លារទៅក្នុងធនាគារមុនដំណាច់ឆ្នាំ២០២៣ នឹងអាចបន្តដកជាប្រាក់ដុល្លារបាននៅឆ្នាំ២០២៤ ប៉ុន្តែចំពោះអ្នកដាក់ប្រាក់ដុល្លារចាប់ពីឆ្នាំ២០២៤ គឺអាចដកជារូបិយប័ណ្ណក្នុងស្រុកតែប៉ុណ្ណោះដោយគិតតាមហាងឆេងប្ដូរប្រាក់ផ្លូវការបច្ចុប្បន្ន។ ហើយបើគេចង់ផ្ទេរប្រាក់ក៏អាចផ្ទេរបានដែរ ហើយបើគេចង់ប្រើកាតជាដុល្លារ គេក៏អាចប្រើវាបានដែរនៅក្នុងប្រទេសអ៊ីរ៉ាក់ ប៉ុន្តែត្រូវគិតតាមហាងឆេងប្ដូរប្រាក់ជាផ្លូវការ។

មួយវិញទៀត បើគេចង់ដកសាច់ប្រាក់វិញ គេក៏អាចដកបានដែរ ដោយគិតតាមអត្រាប្ដូរប្រាក់ផ្លូវការជាប្រាក់ឌីណា (dinar) ជារូបិយប័ណ្ណមួយសម្រាប់ចាយនៅតំបន់អ៊ីរ៉ាក់។ ប៉ុន្តែកុំនិយាយជាមួយលោកអំពីប្រាក់ដុល្លារទៀតអី គឺលែងឱ្យដកចេញពីធនាគារទៀតហើយ។

ទោះយ៉ាងណា ក្រោយមកធនាគារកណ្តាលអ៊ីរ៉ាក់ ក៏បានចេញសេចក្ដីថ្លែងការណ៍មួយថា ការហាមឃាត់ការដកជាប្រាក់ដុល្លារនេះ នឹងអនុវត្តចំពោះតែរាល់គណនីណា ដែលទទួលការផ្ទេរប្រាក់ពីបរទេសតែប៉ុណ្ណោះ។

ធនាគារក្នុងស្រុកជាច្រើនបានដាក់កំហិតលើការដកប្រាក់ដុល្លាររួចទៅហើយក្នុងរយៈប៉ុន្មានខែកន្លងមកនេះ ដោយធ្វើឱ្យការខ្វះខាតប្រាក់ដុល្លារកាន់តែខ្លាំងឡើងជាហេតុធ្វើឱ្យអត្រាប្តូរប្រាក់នៅតាមទីផ្សារស្របគ្នាបន្តកើនឡើងជាបន្តបន្ទាប់ផងដែរ៕

អត្ថបទ៖ សុខ ជា