ក្រសួងការបរទេសមីយ៉ាន់ម៉ាកាលពីថ្ងៃអាទិត្យ ទី២៧ ខែសីហា បានថ្កោលទោសចំពោះ «សកម្មភាពមិនទទួលខុសត្រូវ» របស់ទីម័រខាងកើត និងបញ្ជាឱ្យតំណាងអ្នកទូតរបស់ប្រទេសនេះ ដែលប្រចាំនៅទីក្រុងយ៉ាំងហ្គោន «ចាកចេញពីប្រទេសមីយ៉ាន់ម៉ាមិនលើសថ្ងៃទី១ខែកញ្ញា»។ ក្រសួងការបរទេស បានសរសេរលើនៅគេហទំព័រហ្វេបុកផ្លូវការរបស់ខ្លួនថា ទីម័រខាងកើតកំពុងលើកទឹកចិត្តក្រុមភេរវករ ប្រព្រឹត្តអំពើរំលោភបំពានរបស់ពួកគេបន្ថែមទៀតនៅក្នុងប្រទេសមីយ៉ាន់ម៉ា។
អត្ថបទគួរអាន
ក្រោយពីរងវិធានការក្ដៅពីរបរយោធាមីយ៉ាន់ម៉ាដូច្នេះ ប្រទេសទីម័រខាងកើតបានចេញសេចក្តីថ្លែងការណ៍មួយឆ្លើយតបវិញ ដោយថ្កោលទោសការសម្រេចបណ្តេញនេះ និងបញ្ជាក់ជាថ្មីចំពោះសារៈសំខាន់នៃការគាំទ្ររបស់ខ្លួន «ក្នុងការធ្វើឱ្យវិលត្រឡប់មកវិញនៃស្ថិរភាពប្រជាធិបតេយ្យក្នុងប្រទេសមីយ៉ាន់ម៉ា និងជំរុញឱ្យយោធាធានាការគោរពសិទ្ធិមនុស្ស និងស្វែងរកដំណោះស្រាយប្រកបដោយភាពស្ថាបនាចំពោះវិបត្តិ»។
កាលពីខែមុន ប្រធានាធិបតីទីម័រខាងកើត លោក Jose Ramos-Horta បានជួបជាមួយរដ្ឋមន្ត្រីការបរទេសនៃរដ្ឋាភិបាលស្រមោលមីយ៉ាន់ម៉ាលោក Zin Mar Aung នៅរដ្ឋធានី Dili របស់ទីម័រខាងកើត។ ស្ថិតក្នុងដំណើរឆ្ពោះទៅក្លាយជាសមាជិកទី១១របស់សមាគមន៍ប្រជាជាតិអាស៊ីអាគ្នេយ៍ (អាស៊ាន) នៅឆ្នាំនេះ ទីម័រខាងកើតសង្ឃឹមថា ខ្លួននឹងអាចជួយឱ្យអាស៊ានបញ្ចុះបញ្ចូលរបបសឹកឱ្យបញ្ចប់ជម្លោះ ខណៈនៅ២ឆ្នាំមកនេះ ប្លុកនេះ បានបរាជ័យ ក្នុងការបញ្ចប់អំពើហិង្សាក្នុងប្រទេសមីយ៉ាន់ម៉ា។
ក្នុងការតវ៉ាប្រឆាំងនឹងរដ្ឋប្រហារឆ្នាំ២០២១ ប្រទេសជាច្រើនបានដកឯកអគ្គរដ្ឋទូតរបស់ខ្លួនចេញពីប្រទេសមីយ៉ាន់ម៉ា និងជំនួសមកវិញដោយមន្ត្រីការទូត។ ទោះយ៉ាងណាក៏ដោយ ជារឿយៗយោធាមីយ៉ាន់ម៉ានៅតែបណ្តេញ ឬបដិសេធទទួលជួបអ្នកការទូតប្រទេសណាមួយ ជាពិសេសនៅពេលមន្ត្រីទាំងនោះមានទំនាក់ទំនងជាមួយរដ្ឋាភិបាលស្រមោលមីយ៉ាន់ម៉ា ដែលភាគច្រើនកំពុងរស់នៅបរទេសក្រោយរដ្ឋប្រហារ។
លោក Linn Thant តំណាងរដ្ឋាភិបាលស្រមោលមីយ៉ាន់ម៉ា (NUG) ដែលមានមូលដ្ឋាននៅទីក្រុង Prague នៃសាធារណរដ្ឋឆែក បានថ្កោលទោសការសម្រេចចិត្តរបស់របបយោធានេះ ហើយបានប្រាប់ AFP ថា វាជារឿងមិនមានហេតុផលសម្រាប់ការបណ្តេញអ្នកការទូតទីម័រខាងកើតនោះទេ។ ជាមួយគ្នា មកទល់នឹងពេលនេះ គេនៅមិនដឹងច្បាស់ថា តើមន្ត្រីការទូតទីម័រខាងកើតនោះនៅកន្លែងណាទេ៕
