លោក ម៉ាសាស៊ី ម៉ាត់ស៊ូយ៉ាម៉ា (Masashi Matsuyama) អនុប្រធានក្រុមហ៊ុន Nissan Motor និងជាប្រធានក្រុមហ៊ុន Nissan China បានប្រាប់អ្នកសារព័ត៌មាននៅទីក្រុងប៉េកាំងថា ក្រុមហ៊ុនរថយន្តកំពូលរបស់ជប៉ុនមួយនេះកំពុងពិចារណានាំចេញរថយន្តទាំងម៉ូឌែលប្រើសាំង និងរថយន្តអគ្គិសនីគ្រប់ប្រភេទដែលផលិត និងអភិវឌ្ឍក្នុងប្រទេសចិនទៅកាន់ទីផ្សារអន្តរជាតិ។
មិនខុសពីក្រុមហ៊ុនរថយន្តបរទេសមួយចំនួនដូចជាក្រុមហ៊ុន Tesla ក្រុមហ៊ុន BMW និងក្រុមហ៊ុន Ford នោះឡើយ ក្រុមហ៊ុន Nissan កំពុងពង្រីកការនាំចេញរថយន្តដែលផលិតនៅចិន ដើម្បីទាញយកប្រយោជន៍ពីតម្លៃផលិតកម្មទាបរបស់ប្រទេសនេះ និងដើម្បីបង្កើនការប្រើសមត្ថភាពរោងចក្ររបស់ពួកគេ។
ប្រទេសចិន មានចំណែកត្រឹមតែជាង១ភាគ៥នៃការលក់រថយន្តរបស់ក្រុមហ៊ុន Nissan នៅទូទាំងពិភពលោកដោយលក់បានជិត៣លានគ្រឿងក្នុងរយៈពេល១០ខែដំបូងនៃឆ្នាំនេះ ពោលគឺបានធ្លាក់ចុះជាង១ភាគ៣សម្រាប់រយៈពេលដូចគ្នាកាលពីឆ្នាំមុន។
អត្ថបទគួរអាន
ក្រុមហ៊ុនរថយន្តជប៉ុន មួយចំនួនបានប្រឈមនឹងបញ្ហាលក់រថយន្តដ៏ធ្ងន់ធ្ងរក្នុងប្រទេសចិន នៅឆ្នាំនេះដែលជាទីផ្សាររថយន្តដ៏ធំបំផុតរបស់ពិភពលោក ដោយសារតែម៉ាករថយន្តក្នុងស្រុកទទួលបានការពេញនិយម និងការប្រកួតប្រជែងតម្លៃគ្នាយ៉ាងខ្លាំង ចំពេលមានការផ្លាស់ប្តូរទៅប្រើរថយន្តអគ្គិសនីយ៉ាងឆាប់រហ័ស។
ស្របពេលក្រុមហ៊ុន Nissan កំពុងពិចារណានាំយករថយន្តពីប្រទេសចិនទៅលក់នៅតាមទីផ្សារខាងក្រៅនោះ ក្រុមហ៊ុនរថយន្តចិនមួយចំនួនដូចជាក្រុមហ៊ុន BYD ជាដើមកំពុងកំណត់យកទីផ្សាររថយន្តនៅជប៉ុនជាគោលដៅនាំចេញរថយន្តអគ្គិសនីរបស់ខ្លួន។
សម្រាប់ក្រុមហ៊ុន BYD ដែលជាក្រុមហ៊ុនរថយន្តអគ្គិសនីដ៏កំពូលរបស់ចិន ប្រទេសជប៉ុន គឺជាមូលដ្ឋានបញ្ចេញសមត្ថភាពរបស់ខ្លួនក្នុងការវាយលុកទីផ្សារបរទេស ហើយប្រសិនបើទទួលបានជោគជ័យក្នុងការពង្រីកទីផ្សារនៅជប៉ុន ដែលល្បីខាងតឹងតែងចំពោះរថយន្តនាំចូលនោះ វានឹងអាចជោគជ័យគ្រប់ទីកន្លែង។
លោក វ៉ាង ឈាន់ហ្វូ (Wang Chuanfu) ជាស្ថាបនិកក្រុមហ៊ុន BYD បាននិយាយថា ការប្តេជ្ញាចិត្តរបស់ក្រុមហ៊ុន ដើម្បីស្វែងរកភាពជោគជ័យនៅជប៉ុននេះ បានបង្ហាញឱ្យដឹងតាំងពីខែតុលា មកម្ល៉េះ ដែលពេលនោះក្រុមហ៊ុននេះបានអញ្ជើញអ្នកចែកចាយរថយន្តមកពីទូទាំងប្រទេសឱ្យចូលរួមសន្និសីទនៅឯសណ្ឋាគារមួយក្នុងទីក្រុងតូក្យូ។
អត្ថបទ៖ សុខ ជា
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
