មេបញ្ជាការអ៊ុយក្រែនបាននិយាយថា ការប្រយុទ្ធគ្នា និងការទម្លាក់គ្រាប់បែកបានកើតឡើងកាន់តែខ្លាំងជាងមុនទៀតនៅក្នុងទីក្រុង ម៉ារីយ៉ូប៉ូល ពោលគឺនៅមួយថ្ងៃបន្ទាប់ពីក្រុងមួយនេះបានបដិសេធឱសានវាទពីរុស្ស៊ី ដែលឲ្យពួកគេលើកទង់ជ័យសសុំចុះចាញ់។ មនុស្សរាប់រយពាន់នាក់ត្រូវបានគេជឿថា កំពុងសំងំលាក់ខ្លួននៅខាងក្នុងអគារ ដោយមិនមានអាហារ ទឹក និងថាមពលអគ្គិសនីប្រើប្រាស់នោះទេ។
ទោះបីព្យាយាមបង្កើនការវាយប្រហារខ្លាំងជាងមុនក៏ដោយ ក៏រុស្ស៊ី នៅមិនទាន់អាចវាយគ្រប់គ្រងបានទីក្រុងដ៏សំខាន់មួយនេះបាននៅឡើយ។ ប៉ុន្តែបើតាមសេចក្តីរាយការណ៍ពីទីភ្នាក់ងារសារព័ត៌មានរបស់រុស្ស៊ីបាននិយាយថា កងកម្លាំងរុស្ស៊ី និងពួកឧទ្ទាមបំបែកខ្លួនដែលគាំទ្រដោយរុស្ស៊ីនោះ បានកាន់កាប់ប្រហែលពាក់កណ្តាលនៃទីក្រុងទៅហើយ ដែលជាធម្មតាពាក់កណ្តាលនៃទីក្រុង គឺអាចមានប្រជាជនប្រហែល ៤០ម៉ឺននាក់រស់នៅ។
បើតាមអភិបាលរងក្រុង Mariupol លោក សេរឺហ្កី អរឡូវ(Sergei Orlov) បានប្រាប់ CNN ថា ទីក្រុងនេះស្ថិតនៅក្រោមការបិទផ្លូវចេញចូលទាំងស្រុង ហើយពិបាកនឹងទទួលជំនួយមនុស្សធម៌ខ្លាំងណាស់ ប្រការនេះរិតតែជំរុញឲ្យស្ថានភាពមនុស្សធម៌កាន់តែដុនដាបមួយកម្រិតទៀត។
អត្ថបទគួរអាន
ហេតុអ្វីក្រុងកំពង់ផែម៉ារីយ៉ូប៉ូលជាផ្ទាំងស៊ីបរបស់ទាហានរុស្ស៊ីខ្លាំងម្ល៉េះ?
ក្រុង Mariupol បានក្លាយជាចំណុចសំខាន់នៃសង្គ្រាមនៅអ៊ុយក្រែន ដែលបានផ្ទុះឡើងតាំងតែពីថ្ងៃទី២៤ខែកុម្ភៈ នៅពេលដែលប្រធានាធិបតីរុស្ស៊ីលោក Vladimir Putin បានសម្រេចបញ្ជូនកងទ័ពចូលដែនដីអ៊ុយក្រែននៅថ្ងៃដំបូងមក។
ក្រុងកំពង់ផែមួយនេះស្ថិតនៅលើតាមបណ្តោយសមុទ្រ Azov ដែលជាផ្លូវនាវាចរដ៏សំខាន់សម្រាប់នាវាចម្បាំង ហើយការដណ្តើមបានក្រុងមួយនេះ នឹងអនុញ្ញាតឱ្យរុស្ស៊ីភ្ជាប់តំបន់នានានៅភាគខាងកើត ដែលកាន់កាប់ដោយពួកបំបែកខ្លួនគាំទ្រដោយរុស្ស៊ី ជាមួយនឹងតំបន់ គ្រីមេ ដែលទីក្រុងម៉ូស្គូបានកាត់យកកាលពីឆ្នាំ២០១៤ ពីអ៊ុយក្រែន។
គួរជម្រាបថា ប្រធានាធិបតីអ៊ុយក្រែន លោក Volodymyr Zelenskiy បាននិយាយនៅថ្ងៃពុធនេះថា ការពិភាក្សាសន្តិភាពរវាងអ៊ុយក្រែន និងរុស្ស៊ីអាចជាការតឹងសសៃកដាក់គ្នា ប៉ុន្តែវានឹងនៅតែឆ្ពោះទៅមុខដដែល ខណៈដែលលោកខាងលិចគ្រោងក៏នឹងបន្តដាក់ទណ្ឌកម្មបន្ថែមទៀតប្រឆាំងនឹងវិមានក្រឹមឡាំង។ ប៉ុន្តែទណ្ឌកម្មថ្មីៗ នឹងមានអ្វីខ្លះនោះ គេត្រូវរង់ចាំដល់កិច្ចប្រជុំ អាមេរិក-អឺរ៉ុប ដែលនឹងធ្វើឡើងនៅថ្ងៃព្រហស្បតិ៍ទី ២៤មីនា សប្តាហ៍នេះ បិទបញ្ចប់ជាមុនសិន។
សង្គ្រាមដែលអូសបន្លាយអស់ពេលមួយខែមកហើយ មិនទាន់បង្ហាញពីសញ្ញាធូរស្បើយបន្តិចទេ ហើយផ្ទុយទៅវិញ មានតែតានតឹងឡើងៗ។ ជាក់ស្តែងអ្នកនាំពាក្យវិមានក្រឹមឡាំង លោកឌីមេទ្រី ប៉េសស្កូវ (Dmitry Peskov) ក្នុងបទសម្ភាសមួយកាលពីថ្ងៃទី២២ ខែមីនា បានអះអាងថា គោលនយោបាយសន្តិសុខជាតិរុស្ស៊ីគឺបានអនុញ្ញាតឱ្យប្រើប្រាស់អាវុធនុយក្លេអ៊ែរ ក្នុងកាលៈទេសៈណាដែលសន្តិសុខជាតិរុស្ស៊ីរងការគំរាមកំហែង និងក្រោមហេតុផលមួយចំនួនទៀតដែលបានចែង។
គួររំឭកថា កងកម្លាំងនុយក្លេអ៊ែររុស្ស៊ីតាំងតែពីខែមុនមកម្ល៉េះ បានស្ថិតក្នុងលក្ខណៈត្រៀមប្រុងជើងការកម្រិតខ្ពស់បំផុតមិនធ្លាប់មាន ក្រោមបទបញ្ជារបស់បុរសខ្លាំង វ្ល៉ាឌីមៀ ពូទីន។ ប្រការនេះបានធ្វើឱ្យលោកខាងលិចបារម្ភថា រុស្ស៊ីអាចប្រើប្រាស់អាវុធប្រល័យលោកជាយថាហេតុ។
ទោះបីជាបស្ចឹមលោកមានក្តីបារម្ភបែបនេះក្តី ប្រមុខអង្គការសហប្រជាជាតិ លោក អាន់តូនីញ៉ូ ហ្គូតេរ៉េស កាលពីពេលថ្មីៗបានលើកឡើងថា សង្គ្រាមរុស្ស៊ី-អ៊ុយក្រែន នឹងមិនមានអ្នកឈ្នះ និង អ្នកចាញ់ឡើយ ដោយក្នុងពេលឆាប់ៗខាងមុខ វានឹងប្តូរពីការប្រយុទ្ធគ្នា ទៅជាការចរចាប្រកបដោយសន្តិភាព៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
