គណបក្សសកម្មភាពប្រជាជន ដែលកំពុងកាន់អំណាចនៅសិង្ហបុរី បានបញ្ជាក់ពីជំហររបស់រដ្ឋាភិបាលនៅក្នុងសភា ដោយផ្ដោតសំខាន់លើការពង្រឹងច្បាប់ស្ដីពីការលាងលុយកខ្វក់ ខណៈមានការត្រួតពិនិត្យកាន់តែខ្លាំងឡើងពីតួនាទីរបស់មន្ត្រីសិង្ហបុរី ពាក់ព័ន្ធនឹងការជួយបិទបាំងលុយកខ្វក់ នៅចំពេលវិនិយោគិន និងអ្នកមានទ្រព្យសម្បត្តិស្ដុកស្ដម្ភកាន់តែច្រើនឡើងកំពុងយកទ្រព្យសម្បតិ្តរបស់ពួកគេមកទុកដាក់នៅក្នុងប្រទេសនេះ។
ទោះយ៉ាងណា រដ្ឋាភិបាលសិង្ហបុរី ក៏បានបដិសេធដែរថា អាជ្ញាធររបស់ខ្លួនមិនបានរងសម្ពាធណាមួយពីទីក្រុងប៉េកាំងជាថ្នូរនឹងការចាប់ផ្តើមធ្វើប្រតិបត្តិការនាពេលថ្មីៗនេះ ដើម្បីឃាត់ខ្លួនជនជាតិចិនជាច្រើននាក់ ដែលសង្ស័យពាក់ព័ន្ធនឹងករណីលាងលុយកខ្វក់ដ៏ល្បីល្បាញនោះឡើយ។
អនុរដ្ឋមន្ត្រីក្រសួងមហាផ្ទៃសិង្ហបុរី លោកស្រី ចូសេហ្វីន តេអូ (Josephine Teo) បាននិយាយកាលពីថ្ងៃទី៣ ខែតុលាថា មានព័ត៌មានមួយចំនួនបានចុះផ្សព្វផ្សាយតាមបណ្តាញព័ត៌មានជាតិ និងអន្តរជាតិថា ប្រតិបត្តិការបង្ក្រាបលើករណីលាងលុយកខ្វក់ថ្មីៗនេះ ត្រូវបានធ្វើឡើងតាមការបញ្ជារបស់ប្រទេសចិន ប៉ុន្តែនេះជារឿងមិនពិតទាំងស្រុងតែម្ដង។
អត្ថបទគួរអាន
សូមរំលឹកថា ប៉ូលិសសិង្ហបុរីបានចាប់ខ្លួនជនបរទេសចំនួន១០នាក់ ដែលជាជនជាតិចិន ប៉ុន្តែពួកគេបានកាន់លិខិតឆ្លងដែនផ្សេងៗគ្នាកាលពីពាក់កណ្ដាលខែសីហា ជាប់ចោទពីបទលាងលុយកខ្វក់ តាមរយៈសកម្មភាពខុសច្បាប់នៅក្នុងប្រទេសសិង្ហបុរី ក្រោយពីក្រសួងមហាផ្ទៃ បានធ្វើការស៊ើបអង្កេត និងតាមដានរយៈពេល២ឆ្នាំមកហើយ។
អាជ្ញាធរជឿថា ជនសង្ស័យទាំងនេះបានទទួលផលចំណេញទាំងនោះពីសកម្មភាពឧក្រិដ្ឋកម្មនៅខាងក្រៅប្រទេសសិង្ហបុរី ដែលរួមមានល្បែងស៊ីសងខុសច្បាប់ ការលេងល្បែងតាមអនឡាញខុសច្បាប់ និងការខ្ចីប្រាក់ដែលគ្មានអាជ្ញាប័ណ្ណ។ ជនជាប់ចោទមួយចំនួនក៏ត្រូវបានចោទប្រកាន់ពីបទក្លែងបន្លំខុសច្បាប់ផងដែរ។
ទ្រព្យសម្បត្តិរបស់ជនសង្ស័យ ដែលត្រូវបានរឹបអូស និងបង្កកដំបូងឡើយមានចំនួនប្រហែល១ ពាន់លានដុល្លារសិង្ហបុរី ប្រហែលជាង ៧២៧លានដុល្លារ ប៉ុន្ដែបើតាម លោកស្រី ចូសេហ្វីន តេអូ អនុរដ្ឋ មន្ត្រីក្រសួងមហាផ្ទៃសិង្ហបុរី បាននិយាយកាលពីថ្ងៃទី៣ ខែតុលាថា បើបូកសរុបចំនួនទឹកប្រាក់ដែលរឹបអូសបានតាំងពីថ្ងៃបង្ក្រាបនោះមកដល់ពេលនេះ គឺបានកើនឡើងដល់ជិត ៣ពាន់លានដុល្លារសិង្ហបុរី ឬ ប្រហែលជាង២ពាន់លានដុល្លារអាមេរិក៕
អត្ថបទ៖ សុខ ជា
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
