ករណីឆ្លងកូវីដ១៩ប្រចាំថ្ងៃនៅកូរ៉េខាងត្បូងបានកើនឡើងដល់តួលេខរាប់សែននាក់ក្នុងមួយថ្ងៃ គិតចាប់តាំងពីពាក់កណ្ដាលខែកុម្ភៈមកម្ល៉េះ ហើយនៅតួលេខចុងក្រោយនេះ ករណីឆ្លងក្នុងមួយថ្ងៃនៅក្នុងប្រទេសនេះ បានហក់ឡើងខ្ពស់ដល់ទៅ ជាង៤០ម៉ឺននាក់។ បើគិតត្រឹម១សប្ដាហ៍ចុងក្រោយនេះ កំណើនករណីឆ្លងថ្មីបានកើនឡើង ២០%។ នេះបើតាមទិន្នន័យដែលបង្ហាញដោយរដ្ឋាភិបាលកូរ៉េខាងត្បូង។
ប្រជាជនមានវ័យ ១៨ឆ្នាំ និងក្រោម១៨ឆ្នាំកូរ៉េខាងត្បូង គឺមានភាពយឺតយ៉ាវក្នុងការទទួលការចាក់វ៉ាក់សាំង ហើយកត្តានេះ បានធ្វើឲ្យក្រុមមនុស្សក្នុងវ័យនេះ គឺមានចំណែក ២៦% នៃករណីឆ្លងថ្មី ហើយចំពោះពលរដ្ឋដែលមានវ័យ៦០ឆ្នាំឡើងទៅ ដែលមានប្រព័ន្ធភាពស៊ាំចុះខ្សោយនោះ មានចំណែក១៧% នៃករណីឆ្លងថ្មី ដែលបានរកឃើញនាពេលកន្លងមកនេះ។
គិតត្រឹមកាលពីសប្ដាហ៍នេះ ប្រទេសកូរ៉េខាងត្បូងមានករណីស្លាប់ដោយសារកូវីដ១៩ ជាមធ្យមក្នុងមួយថ្ងៃ មានប្រហែល២៣០នាក់ ហើយបច្ចុប្បន្ន មាន ៦៤%នៃគ្រាមន្ទីរពេទ្យក៏ត្រូវបានពេញទៅដោយអ្នកជំងឺ ហើយតួលេខអ្នកសម្រាកនៅមន្ទីរពេទ្យនេះ ត្រូវបានគេរំពឹងថា អាចនឹងបន្ដកើនឡើងថែមទៀត។
អត្ថបទគួរអាន
បច្ចុប្បន្ន កូរ៉េខាងត្បូង មានចំណែក២០% នៃករណីឆ្លងថ្មីកូវីដ១៩នៅទូទាំងពិភពលោក គឺមានករណីឆ្លងកូវីដ១៩ប្រចាំថ្ងៃ ច្រើនជាងប្រទេសណាណាទាំងអស់។ នេះបើតាមការកត់ត្រាតួលេខដោយស្ថាប័ន Worldometer។ ប្រទេសឈរបន្ទាប់ពីកូរ៉េខាងត្បូង ដែលមានករណីឆ្លងថ្មីកូវីដ១៩ប្រចាំថ្ងៃច្រើនជាងគេបង្អស់នោះ គឺអាល្លឺម៉ង់ វៀតណាម រុស្ស៊ី និងហូឡង់។
ការកើនឡើងនៃករណីឆ្លងកូវីដ១៩នៅប្រទេសកូរ៉េខាងត្បូងនាពេលថ្មីៗនេះ គឺមួយផ្នែកត្រូវបានជំរុញដោយការប្រមូលផ្ដុំគ្នាទ្រង់ទ្រាយធំ ក្នុងការចូលរួមបោះឆ្នោតប្រធានាធិបតីថ្មី កាលពីថ្ងៃទី ៩ ខែមីនាកន្លងទៅនេះ។ រដ្ឋាភិបាលក៏បានលុបចោលការរឹតត្បិតមួយចំនួន នៅតាមភោជនីយដ្ឋាន និងគ្រឹះស្ថានផ្សេងៗទៀត ដើម្បីឆ្លើយតបនឹងទាមទារពីសំណាក់ម្ចាស់អាជីវកម្ម ដែលកត្តាធូរលុងវិធានការទប់ស្កាត់កូវីដ១៩ទាំងអស់នេះហើយ ដែលបង្កឲ្យករណីឆ្លងបានហក់ឡើងខ្ពស់បំបែកកំណត់ត្រារបស់ខ្លួនយ៉ាងដូច្នេះ។
យ៉ាងណាក៏ដោយចុះ កូរ៉េខាងត្បូង មានពលរដ្ឋ៨០%ហើយដែលបានចាក់វ៉ាក់សាំង និងមានការចាក់ដូសជំរុញដល់ពលរដ្ឋដែលមានវ័យចាប់ពី៦០ឆ្នាំឡើងទៅផងដែរ ដូច្នេះហើយ ទើបវាបានចូលរួមកាត់បន្ថយអត្រាស្លាប់បាតបង់ជីវិតបានច្រើន បើធៀបនឹងកាលពីមុន។
មន្ត្រីជាន់ខ្ពស់រដ្ឋាភិបាលកូរ៉េខាងត្បូងបានអះអាងថា បច្ចុប្បន្ននេះ មេរោគកូវីដ១៩បំប្លែងថ្មីអូមីក្រុង បានឆ្លងរាលដាលដល់កម្រិតកំពូលហើយ ហើយរដ្ឋាភិបាលនឹងខិតខំធ្វើយ៉ាងណាឲ្យករណីឆ្លងនឹងធ្លាក់ចុះមកវិញក្នុងពេលឆាប់ៗ ប៉ុន្ដែ រដ្ឋាភិបាលហាក់មិនមានផែនការក្នុងការរឹតត្បិតបន្ថែមនោះទេ៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
