គណៈរដ្ឋមន្ត្រីចាំផ្ទះថៃទុកបំណុលជាង២ពាន់លានដុល្លារ ឱ្យគណរដ្ឋមន្រ្តីថ្មីដោះស្រាយ

លោក ណាត់ចារី អានុនតាស៊ីលប៉ា (Natjaree Anuntasilpa) អគ្គលេខាធិការនៃលេខាធិការដ្ឋានគណៈរដ្ឋមន្រ្តី បាននិយាយថា ខុទ្ទកាល័យនាយករដ្ឋមន្ត្រីចាំផ្ទះ ប្រាយុទ្ធ ចាន់អ៊ូចា បានទទួលស្គាល់បំណុលទំហំជិត ៧៩ ពាន់លានបាត ឬជាង២ពាន់២រយលានដុល្លារ ដែលរដ្ឋបាលរាជធានីបាងកកជំពាក់ក្រុមហ៊ុនប្រព័ន្ធដឹកជញ្ជូនសាធារណៈនៅទីក្រុងបាងកក គឺប្រតិបត្តិកររថភ្លើងលើអាកាស (BTS) ក្នុងប្រតិបត្តិការនិងការពង្រីកបណ្ដាញដឹកជញ្ជូន។

ពាក់ព័ន្ធនឹងកញ្ចប់បំណុលនេះ រដ្ឋមន្ត្រីក្រសួងមហាផ្ទៃ លោក អានុពង្ស ផាវចិន្តា (Anupong Paochinda) ក៏បានបង្ហាញរបាយការណ៍បំណុលដែលកើតពីការចាប់ដៃធ្វើអាជីវកម្មរបស់រដ្ឋបាលរាជធានីបាងកក ជាមួយនឹងប្រតិបត្តិករក្រុមហ៊ុន BTS នេះផងដែរ។

ប្រភពបាននិយាយថា គណៈរដ្ឋមន្ត្រីចាំផ្ទះអាចត្រឹមតែទទួលស្គាល់របាយការណ៍នេះ ហើយទុកវាឱ្យរដ្ឋាភិបាលបន្ទាប់ជាអ្នកសម្រេចចិត្តអំពីវិធីដោះស្រាយបំណុលដ៏ធំនេះ។

រដ្ឋបាលរាជធានីបាងកកបានស្នើឱ្យគណៈរដ្ឋមន្ត្រីអនុម័តថវិកាសម្រាប់រដ្ឋបាលក្រុងដើម្បីសងបំណុលរបស់ខ្លួនឱ្យក្រុមហ៊ុនប្រតិបត្តិកររថភ្លើងលើអាកាស។

យោងតាមរបាយការណ៍ បំណុលនេះរួមមាន ៥៥ ពាន់លានបាត ឬជាង១ពាន់៥រយលានដុល្លារ សម្រាប់ការសាងសង់ និងការចំណាយលើការដកហូតដីដែលកើតឡើងអំឡុងពេលពង្រីកខ្សែរត់ បូករួមទាំងការប្រាក់, បំណុលជាង៦រយលានដុល្លារដែលកើតឡើងពីការជួលឱ្យក្រុមហ៊ុនប្រតិបត្តិករដំឡើងប្រព័ន្ធអគ្គិសនីនិងមេកានិចសម្រាប់ការពង្រីកបណ្ដាញ និងបំណុលជិត៤៣លានដុល្លារទៀតដែលរដ្ឋបាលរាជធានីបាងកកបានខ្ចីពីក្រសួងហិរញ្ញវត្ថុ។

តាមការគ្រោងទុក រដ្ឋាភិបាលថៃដែលកើតពីការបោះឆ្នោតនៅខែឧសភាមុននេះ អាចនឹងត្រូវបានតែងតាំងនៅក្នុងរង្វង់ថ្ងៃទី ១៣ ខែកក្កដា៕