ការគ្រប់គ្រងបំណុលគ្រួសារមានបញ្ហាប្រឈមជាច្រើនដោយសារតែម្ចាស់បំណុលមួយចំនួនបដិសេធមិនចូលរួមក្នុងដំណើរការដោះស្រាយបញ្ហានេះ។ នេះបើតាមលោក សេដ្ឋា ថាវីស៊ីន បានប្រាប់សន្និសីទសារព័ត៌មានស្តីពីវិធានការ ដើម្បីដោះស្រាយបំណុលទាំងក្នុង និងក្រៅប្រព័ន្ធហិរញ្ញវត្ថុ។
ថៃមានអនុបាតបំណុលគ្រួសារខ្ពស់បំផុតមួយនៅក្នុងតំបន់ គឺមានជាង៤៥១ពាន់លានដុល្លារ ឬស្មើនឹងជិត៩១%នៃផលិតផលក្នុងស្រុកសរុបគិតត្រឹមចុងខែកញ្ញា ឆ្នាំ២០២៣ ហើយការប្រើប្រាស់កម្ចីក្រៅផ្លូវការខុសច្បាប់ភាគច្រើន គឺជាក្រុមគ្រួសារមានចំណូលទាប ដែលមិនអាចទទួលបានប្រាក់កម្ចីពីធនាគារ ជាហេតុធ្វើឱ្យពួកគេភាគច្រើនជាប់ជំពាក់ដោយបំណុលដែលមានអត្រាការប្រាក់ខ្ពស់ជាងនៅធនាគារ។
លោក សេដ្ឋា បានប្រាប់អ្នកកាសែតថា កត្តានេះហើយទើបជំរុញឱ្យធនាគារប្រាក់សន្សំរបស់រដ្ឋាភិបាល គ្រោងបង្កើតក្រុមហ៊ុនគ្រប់គ្រងទ្រព្យសកម្មមួយក្នុងបំណងសំខាន់ ដើម្បីជួយដោះស្រាយបំណុលគ្រួសារដ៏រ៉ាំរ៉ៃ និងចេះតែកើនឡើង។ ប៉ុន្តែលោកមិនបានបញ្ជាក់លម្អិតជុំវិញវិសាលភាព និងតួនាទីរបស់ក្រុមហ៊ុននេះនោះទេ គ្រាន់តថា ក្រុមហ៊ុនថ្មីនេះនឹងផ្តល់វិធានការបន្ធូរបន្ថយថែមទៀតដល់ការគ្រប់គ្រងបំណុលគ្រួសារ។
គួរបញ្ជាក់ថា ចាប់តាំងពីខែធ្នូមក រដ្ឋាភិបាលថៃបានជួយដោះស្រាយបំណូលជូនប្រជាពលរដ្ឋបានប្រមាណជាង១ម៉ឺននាក់ជាមួយនឹងបំណុលក្រៅផ្លូវការរួមបញ្ចូលគ្នាជិត១៩លានដុល្លារក្នុងចំណោមមនុស្សជាង១៤ម៉ឺននាក់ ដែលបានចុះឈ្មោះហើយ។ រដ្ឋាភិបាលបានប៉ាន់ប្រមាណថា មានបំណុលក្រៅប្រព័ន្ធប្រហែលជាង១ពាន់លានដុល្លារ។ លោក សេដ្ឋា បានចាត់ទុកបញ្ហាបំណុលនេះ គឺជាឧបសគ្គដ៏ចម្បងមួយនៅក្នុងការពង្រឹងសេដ្ឋកិច្ចរបស់ប្រទេសថៃ៕
អត្ថបទ៖ សុខ ជា
