អគ្គលេខាធិការសហប្រជាជាតិលោក អង់តូនីញ៉ូ ហ្គូធឺរ៉េស កាលពីថ្ងៃអាទិត្យបានបំពេញទស្សនកិច្ចនៅប្រទេសសេណេហ្គាល់សម្រាប់ជើងទី១នៃដំណើរទស្សនកិច្ច ដែលនឹងធ្វើនៅប្រទេស២ទៀត គឺប្រទេសនីហ្សេ (Niger) និងនីហ្សេរីយ៉ានៅតំបន់អាហ្វ្រិក ហើយលោកគ្រោងនឹងចុះទៅពិនិត្យមើលសហគមន៍ ដែលរងគ្រោះដោយជម្លោះ និងការប្រែប្រួលអាកាសធាតុផងដែរ។
ក្នុងពេលបំពេញទស្សនកិច្ចនៅប្រទេសសេណេហ្គាល់ លោក ហ្គូធឺរ៉េស បានអំពាវនាវមានការសម្រាលបំណុលសម្រាប់ប្រទេសមួយចំនួននៅតំបន់អាហ្វ្រិក និងធ្វើការបណ្ដាក់ទុនថែមទៀតដើម្បីជួយស្ដារសេដ្ឋកិច្ចរបស់ពួកគេឡើងវិញ ក្រោយពីរងគ្រោះដោយជំងឺកូវីដ១៩ និងផលប៉ះពាល់នៃសង្គ្រាមនៅប្រទេសអ៊ុយក្រែន។
លោក Guterres បាននិយាយថា ការរំខានដល់ការផ្គត់ផ្គង់ពាណិជ្ជកម្មដោយសារការលុកលុយរបស់ប្រទេសរុស្ស៊ីលើអ៊ុយក្រែនបានបង្កឱ្យមានវិបត្តិអាហារ ថាមពល និងហិរញ្ញវត្ថុក្នុងពេលដំណាលគ្នាជាមួយការផ្ទុះឡើងនៃជំងឺកូវីដ១៩នៅក្នុងទ្វីបអាហ្វ្រិក និងតំបន់ផ្សេងៗទៀតនៅជុំវិញពិភពលោក។
មូលនិធិរូបិយវត្ថុអន្តរជាតិ (IMF) បានឱ្យដឹងពីសប្ដាហ៍មុនថា ជំងឺខូវីដ១៩បានរុញច្រានប្រទេសក្រីក្រជាច្រើនឱ្យធ្លាក់ក្នុងវិបត្តិបំណុល ហើយសង្គ្រាមនៅអ៊ុយក្រែនបានរំខានដល់ការងើបឡើងវិញនៃសេដ្ឋកិច្ចរបស់ពួកគេ ហើយថា អត្រាបំណុលសាធារណៈនៅអនុតំបន់អាហ្វ្រិកសាហារ៉ា គឺខ្ពស់បំផុតមិនធ្លាប់មាននៅក្នុងរយៈពេលជាងពីរទសវត្សរ៍មកនេះ។
អត្ថបទគួរអាន
លោក Guterres បាននិយាយថា ស្ថាប័នហិរញ្ញវត្ថុអន្តរជាតិត្រូវតែដាក់ចេញជាបន្ទាន់នូវវិធានការបន្ធូរបន្ថយបំណុលតាមរយៈការបង្កើនសាច់ប្រាក់ និងទំហំសារពើពន្ធដើម្បីឱ្យរដ្ឋាភិបាលមួយចំនួនអាចមានលទ្ធភាពសងបំណុល និងអាចវិនិយោគលើបណ្ដាញសុវត្ថិភាពសង្គម និងការអភិវឌ្ឍប្រកបដោយចីរភាព។
លោកបានបន្ថែមទៀតថា អង្គការសហប្រជាជាតិបានធ្វើសំណើទៅកាន់ធនាគារពិភពលោក និងមូលនិធិ IMF ទាក់ទងនឹងការកៀងគរមូលនិធិផ្សេងៗ និងកម្មវិធិជំនួយសង្គ្រោះបំណុលរួចហើយ ប៉ុន្តែមកដល់ពេលនេះ ចំណាត់ការរបស់ពួកគេនៅមិនទាន់គ្រប់គ្រាន់នៅឡើយ។
ក្នុងពេលនេះដែរ លោកបានអំពាវនាវឱ្យប្រទេសអ្នកមាន និងក្រុមហ៊ុនផលិតឱសថជួយពន្លឿនការបរិច្ចាគវ៉ាក់សាំងកូវីដ១៩ និងវិនិយោគលើការផលិតវ៉ាក់សាំងក្នុងស្រុកដោយសារចំនួនប្រជាជនអាហ្វ្រិកស្ទើរតែ៨០% នៅមិនទាន់បានចាក់វ៉ាក់សាំងបង្ការជំងឺកូវីដ១៩នៅឡើយទេ។
លោក ហ្គូធឺរ៉េស បន្តទៀតថា ក្រៅពីការចាក់វ៉ាក់សាំង គេក៏បានឃើញអតុល្យភាពធំពាក់ព័ន្ធនឹងការវិនិយោគលើការស្តារឡើងវិញក្រោយជំងឺកូវីដ១៩ ដោយលោកបានបន្ថែមថា ផលិតផលក្នុងស្រុកសម្រាប់មនុស្សម្នាក់ៗនៅអាហ្វ្រិកត្រូវបានព្យាករណ៍ថានឹងមានទាបជាង ៧៥% ធៀបនឹងប្រទេសដទៃទៀតនៅក្នុងពិភពលោកនៅក្នុងរយៈពេល ៥ ឆ្នាំខាងមុខទៀតនេះ៕
អត្ថបទ៖ សុខ ជា
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
