នេះបើតាមការវាយតម្លៃពីការស៊ើបការណ៍ជាសម្ងាត់របស់សហរដ្ឋអាមេរិក និងអ្វីដែលបានបង្ហាញនៅក្នុងរូបភាពពីផ្កាយរណប ដែលថតបាន និងត្រូវបានចុះផ្សាយដោយសារព័ត៌មាន CNBC។
រូបភាពពីបណ្ដាញផ្កាយរណបបានបង្ហាញឲ្យដឹងថា អារ៉ាប៊ីសាអូឌីត បច្ចុប្បន្ន កំពុងផលិតផលគ្រាប់កាំជ្រួចមីស៊ីលបាលីស្ទិករបស់ខ្លួន នៅក្នុងភាគខាងលិចនៃរដ្ឋធានី រីយ៉ាត។ នេះបើតាមការអះអាងរបស់អ្នកស្រាវជ្រាវនៅរដ្ឋកាលីហ្វ័កញ៉ាសហរដ្ឋអាមេរិក។ អ្នកស្រាវជ្រាវរបស់អាមេរិក បានអះអាងទៀតថា តាមអ្វីដែលបានបង្ហាញនៅក្នុងរបាយការណ៍ដែលពួកគេបានរកឃើញនោះ គឺការសាងសង់រោងចក្របង្កើតគ្រាប់កាំជ្រួចមីស៊ីលរបស់អារ៉ាប៊ីសាអូឌីតនេះ មានការផ្ដល់ជំនួយពីប្រទេសចិនផងដែរ។
ជុំវិញនឹងបញ្ហានេះ ប្រទេសចិន បានចេញមកគូសបញ្ជាក់ថា ខ្លួនតែងតែប្រឆាំងចំពោះការរីកសាយភាយនៃអាវុធប្រល័យលោក និងប្រឆាំងការចែកចាយអាវុធប្រភេទនេះនៅជុំវិញពិភពលោកផងដែរ។ បន្ថែមពីនេះ ចិនក៏បានអនុវត្តវិធានការតឹងរ៉ឹងលើការគ្រប់គ្រងការនាំចេញគ្រាប់កាំជ្រួចមីស៊ីល និងបច្ចេកវិទ្យាពាក់ព័ន្ធនឹងអាវុធប្រភេទនេះថែមទៀតផង។ នេះបើតាមអ្វីបានបញ្ជាក់នៅក្នុងសេចក្ដីថ្លែងការណ៍របស់ក្រសួងការបរទេសចិន។ សេចក្ដីថ្លែងការណ៍ដដែលនេះ បានសង្កត់ធ្ងន់ទៀតថា ទីក្រុងប៉េកាំងតែងតែប្រឆាំងនឹងការដាក់ទណ្ឌកម្មឯកតោភាគី ព្រមទាំងបន្តចាត់វិធានការចាំបាច់ ដើម្បីការពារយ៉ាងម៉ឺងម៉ាត់នូវសិទ្ធិ និងផលប្រយោជន៍ផ្ទាល់ខ្លួន។
អត្ថបទគួរអាន
ក្រោយពីមានរបាយការណ៍អំពីការអភិវឌ្ឍកាំជ្រួចមីស៊ីលនេះ វាក៏បានធ្វើឲ្យមានការពិនិត្យមើលអំពីបញ្ហាសន្ដិសុខនៅមជ្ឈិមបូព៌ា និងបង្កជាភាពស្មុគស្មាញដល់កិច្ចខិតខំប្រឹងប្រែងរបស់រដ្ឋបាលលោកចូបៃឌិន ប្រធានាធិបតីអាមេរិក ក្នុងការបង្រួបបង្រួមអ៊ីរ៉ង់ឲ្យចូលទៅក្នុងកិច្ចព្រមព្រៀងនុយក្លេអ៊ែររបស់ខ្លួនជាមួយនឹងមហាអំណាចពិភពលោកឡើងវិញផងដែរ។ បន្ថែមពីនេះទៀត វាក៏អាចបន្ថែមនូវបន្ទុកស្មុគស្មាញថ្មីទៀត ទៅដល់ទំនាក់ទំនងរវាងទីក្រុងវ៉ាស៊ិនតោន និងប៉េកាំងថែមទៀតផង។
មែនទែនទៅ អ៊ីរ៉ង់ និងអារ៉ាប៊ីសាអូឌិត គឺជាសត្រូវនឹងគ្នានៅក្នុងតំបន់មជ្ឈិមបូព៌ា ហើយវាអាចនឹងមានការបារម្ភថា ការផលិតកាំជ្រួចមីស៊ីលបាលីស្ទិកនៅក្នុងរដ្ឋធានី រីយ៉ាតនេះ អាចនឹងប៉ះពាល់ទៅដល់កិច្ចព្រមព្រៀងនៃភាគីទាំងពីរ ហើយវាអាចនឹងធ្វើឲ្យអ៊ីរ៉ង់កាន់តែប្រកាន់ខ្ជាប់នូវគំនិតមិនបោះបង់ការផលិតមីស៊ីលរបស់ខ្លួនផងដែរ។
ជុំវិញបញ្ហានេះ ខាងរដ្ឋាភិបាលអារ៉ាប៊ីសាអូឌីត នៅមិនទាន់មានប្រតិកម្មឆ្លើយតប ចំពោះការលើកឡើងពីការផលិតគ្រាប់មីស៊ីលនេះនៅឡើយទេ គិតត្រឹមថ្ងៃទី ២៦ ខែធ្នូនេះ។
គួរបញ្ជាក់បន្ថែមដែរថា ការបន្តទំនាក់ទំនងយោធោជិតស្និទ្ធរវាងអារ៉ាប៊ីសាអូឌីត និងចិន ក៏ទំនងជាអាចមានក្ដីបារម្ភកាន់តែខ្លាំង សម្រាប់រដ្ឋបាលលោកចូបៃឌិន ប្រធានាធិបតីអាមេរិកផងដែរ ខណៈដែលអាមេរិកបច្ចុប្បន្ន កំពុងព្យាយាមគ្រប់គ្រងទំនាក់ទំនងដ៏ស្មុគស្មាញ និងស្រពេចស្រពិលរវាងខ្លួន និងក្រុងប៉េកាំង ដែលកំពុងវិវត្តកាន់តែយ៉ាប់យ៉ឺនឡើងពីមួយថ្ងៃទៅមួយថ្ងៃ៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
