ថ្លែងនាឱកាសអញ្ជើញចែកសញ្ញាបត្រដល់និស្សិតជ័យលាភី នៅថ្ងៃទី១១ ខែតុលា ឆ្នាំ២០២២ ប្រមុខរាជរដ្ឋាភិបាលកម្ពុជា សម្ដេចតេជោ ហ៊ុន សែន បានគូសបញ្ជាក់ថា មូលហេតុដែលរាជរដ្ឋាភិបាលផ្អាកការរៀបចំព្រះរាជពិធីបុណ្យអុំទូក នៅក្នុងឆ្នាំនេះ មិនមែនដោយសាររាជរដ្ឋាភិបាលខ្វះថវិកានោះទេ ប៉ុន្តែ ឆ្នាំ២០២២នេះ កម្ពុជា ត្រូវធ្វើជាម្ចាស់ផ្ទះនៃកិច្ចប្រជុំកំពូលអាស៊ាន និងកិច្ចប្រជុំពាក់ព័ន្ធ ដូច្នេះ រាជរដ្ឋាភិបាលពិតជាមមាញឹកខ្លាំង ដើម្បីរៀបចំកិច្ចប្រជុំសំខាន់ៗទាំងនេះ។
ព្រះរាជពិធីបុណ្យអុំទូកនៅឆ្នាំ២០២២នេះ ត្រូវនឹងថ្ងៃទី៧ ទី៨ និងទី៩ ខែវិច្ឆិកា ឆ្នាំ២០២២។ ក៏ប៉ុន្តែ សម្តេច ហ៊ុន សែន ក៏បានបញ្ជាក់ដែរថា បើទោះបីជា រាជរដ្ឋាភិបាល ផ្អាកការរៀបចំព្រះរាជពិធីបុណ្យអុំទូក នៅរាជធានីភ្នំពេញក្តី ក៏រាជរដ្ឋាភិបាល បានអនុញ្ញាតឲ្យមានការរៀបចំពិធីបុណ្យអុំទូក នៅតាមបណ្តាខេត្ត ខណៈពេលនេះក៏មានខេត្តមួយចំនួនបាននិងកំពុងមមាញឹកក្នុងការរៀបចំពិធីបុណ្យអុំទូក។
អត្ថបទគួរអាន
បើតាមសម្តេចតេជោ ហ៊ុន សែន កិច្ចប្រជុំកំពូលអាស៊ាន និងកិច្ចប្រជុំពាក់ព័ន្ធ មានភាពមមាញឹកខ្លាំងណាស់ ដែលមានថ្នាក់ប្រមុខរដ្ឋ និងថ្នាក់ដឹកនាំអន្តរជាតិ ជាច្រើន នឹងមកចូលរួម ដូច្នេះនាំឲ្យមានការបិទផ្លូវមួយចំនួន ដើម្បីសម្រួលចរាចរណ៍ដល់ភ្ញៀវអន្តរជាតិ។ លើសពីនេះ សម្តេចតេជោ សូមការយោគយល់ និងខន្តីអភ័យទោស ពីបងប្អូនប្រជាពលរដ្ឋ ចំពោះការបិទផ្លូវ និងការស្ទះចរាចរណ៍ ក្នុងអំឡុងពេលរៀបចំកិច្ចប្រជុំកំពូលអាស៊ាន និងកិច្ចប្រជុំពាក់ព័ន្ធ នាអំឡុងខែវិច្ឆិកា ខាងមុខនេះ។ មួយវិញទៀត សម្ដេច ហ៊ុន សែន ក៏បានបញ្ជាក់ផងដែរថា ការផ្អាកពិធីបុណ្យអុំទូកនៅរាជធានីភ្នំពេញ គឺជាការរក្សាសន្តិសុខដែលកម្ពុជាត្រូវទទួលធ្វើជាម្ចាស់ផ្ទះនៃកិច្ចប្រជុំកំពូលអាស៊ាន ដែលនឹងត្រូវចាប់ផ្តើមពី ថ្ងៃទី១០ ដល់ថ្ងៃទី១៣ ខែវិច្ឆិកា និងមានកិច្ចប្រជុំធំៗ ផ្សេងទៀត។
សូមបញ្ជាក់ថា អំឡុងកិច្ចប្រជុំកំពូលអាស៊ាន និងកិច្ចប្រជុំពាក់ព័ន្ធ សម្ដេចតេជោ ហ៊ុន សែនសម្ដេចក៏បានអញ្ជើញបណ្ដាថ្នាក់ដឹកនាំស្ថាប័នអន្តរជាតិ ជាច្រើនដើម្បីមកចូលរួមវេទិកាកិច្ចសន្ទនាលើកទី២ ទាំងបណ្ដាថ្នាក់ដឹកនាំអាស៊ាន និងបណ្ដាថ្នាក់ដឹកនាំស្ថាប័នអន្តរជាតិ ដូចជា ប្រធានធនាគារពិភពលោក,ប្រធានអង្គការមូលនិធិរូបិយវត្ថុអន្តរជាតិ IMF,អគ្គនាយកធនាគារADB,អគ្គនាយកអង្គការពាណិជ្ជកម្មពិភពលោក,ប្រធានអង្គការសុខភាពពិភពលោក,ប្រធានក្រុមប្រឹក្សាអឺរ៉ុប,ប្រធានអង្គការសហប្រតិបត្តិការក្រុងសៀងហៃ និងប្រធានវេទិកាសេដ្ឋកិច្ចពិភពលោកផងដែរ។ នេះបើតាមការបញ្ជាក់របស់សម្តេចតេជោ ហ៊ុន សែន៕
