តើមានកត្តាអ្វីខ្លះជំរុញឱ្យស្ថាប័នជំនាញព្យាករថា តម្លៃមាសលើទីផ្សារពិភពលោកនឹងហក់ឡើងដល់ខ្ទង់៣ពាន់ដុល្លារក្នុង១តម្លឹងនៅឆ្នាំនេះ?

នៅក្នុងការព្យាករទស្សនវិស័យឆ្នាំ២០២៤ របស់ខ្លួន ក្រុមអ្នកវិភាគនៅក្រុមហ៊ុនស្រាវជ្រាវឯករាជ្យឈានមុខគេក្នុងពិភពលោក ប៊ីស៊ីអេ រីសឺច (BCA Research)បានព្យាករថា តម្លៃមាសលើទីផ្សារពិភពលោកនឹងហក់ឡើងដល់២.២០០ដុល្លារអាម៉េរិកក្នុងមួយអោន ឬប្រមាណខ្ទង់៣ពាន់ដុល្លារអាម៉េរិកក្នុងមួយតម្លឹងនៅឆ្នាំ២០២៤ នេះ។

ខណៈអ្នកវិនិយោគមាសជាច្រើនបន្តតាមដានការបញ្ចុះអត្រាការប្រាក់របស់ធនាគារកណ្ដាលអាម៉េរិក ក្រុមអ្នកវិភាគនៅក្រុមហ៊ុន ប៊ីស៊ីអេ រីសឺច (BCA Research) លើកឡើងថា មានកត្តារួមផ្សំជាច្រើនទៀត ដែលជំរុញឱ្យមាសហក់ឡើងថ្លៃខ្លាំងក្នុងឆ្នាំ២០២៤។ ក្រឡេកទៅមើលគោលនយោបាយរូបិយវត្ថុរបស់សហរដ្ឋអាម៉េរិក ក្រុមហ៊ុន ប៊ីស៊ីអេ រីសឺច (BCA Research) រំពឹងថា ធនាគារកណ្តាលអាម៉េរិកនឹងបញ្ចុះអត្រាការប្រាក់យឺតជាងទីផ្សាររំពឹងទុក។ បច្ចុប្បន្នធនាគារកណ្តាលអាម៉េរិក បានផ្ដល់សញ្ញាថា អាចនឹងមានការបញ្ចុះអត្រាការប្រាក់ចំនួន៣លើកនៅឆ្នាំនេះ។

ក្រុមហ៊ុន ប៊ីស៊ីអេ រីសឺច (BCA Research) ដែលមានមូលដ្ឋាននៅទីក្រុងម៉ុងរេអាល់ (Montreal) ប្រទេសកាណាដា និយាយថា ការធ្លាក់ចុះសម្ពាធអតិផរណា និងការកើនឡើងប្រាក់ឈ្នួលនឹងជួយជំរុញការប្រើប្រាស់ពិតប្រាកដ ដែលជួយគាំទ្រដល់សកម្មភាពសេដ្ឋកិច្ច។

ទោះបីជាអតិផរណាត្រូវបានគេរំពឹងថា នឹងធ្លាក់ចុះយ៉ាងណាក្ដី ក៏ក្រុមហ៊ុន ប៊ីស៊ីអេ រីសឺច (BCA Research)និយាយថា អតិផរណាមិនទំនងជាធ្លាក់ចុះដល់គោលដៅ២% របស់ធនាគារកណ្តាលអាម៉េរិកនោះឡើយ ដែលនឹងធ្វើឱ្យមាសក្លាយជាទ្រព្យសកម្មដ៏ទាក់ទាញសម្រាប់ទប់ទល់អតិផរណារយៈពេលវែង។

ក្រុមអ្នកវិភាគលើកឡើងថា ក្នុងពេលជាមួយគ្នានេះ បំណុលរបស់រដ្ឋាភិបាលដែលចេះតែកើនឡើង ស្ថានភាពមិនប្រាកដប្រជាផ្នែកភូមិសាស្ត្រនយោបាយ និងការប្រែប្រួល នៃនិន្នាការសកលភាវូបនីយកម្ម ត្រូវបានរំពឹងថា នឹងជួយធ្វើឱ្យអតិផរណាអូសបន្លាយរយៈពេលវែង។

ក្រុមអ្នកវិភាគក៏រំពឹងដែរថា ស្ថានភាពមិនប្រាកដប្រជាផ្នែកភូមិសាស្ត្រនយោបាយដូចជានៅតំបន់មជ្ឈិមបូព៌ា អឺរ៉ុបខាងកើត សមុទ្រចិនខាងកើត និងសមុទ្រចិនខាងត្បូង ជាដើមនឹងជួយជំរុញឱ្យមាសក្លាយជាទ្រព្យសកម្មកាន់តែមានភាពទាក់ទាញនៅក្នុងឆ្នាំ២០២៤ នេះ៕

ដោយ: តែម សុខុម