ទោះយ៉ាងណា កាលពីពេលកន្លងទៅថ្មីៗនេះ ឥណ្ឌូនេស៊ីបាននិយាយថា តាមទិន្នន័យបណ្ដោះអាសន្នបង្ហាញថា វ៉ាក់សាំងនេះមានប្រសិទ្ធភាពដល់ទៅ ៩៧% ឯណោះ។
ឥណ្ឌូនេស៊ី កាលពីថ្ងៃអាទិត្យទី០៦ ខែធ្នូ បានប្រកាសថា ខ្លួនបានទទួលវ៉ាក់សាំងកូវីដ-១៩ ជាលើកដំបូង ពីប្រទេសចិន ចំនួន ១,២លានដូស ដែលអាចចាក់ជូនប្រជាជនចំនួន ៦០ម៉ឺននាក់ ខណៈដែលរដ្ឋាភិបាលឥណ្ឌូនេស៊ីត្រៀមរៀបចំកម្មវិធីផ្ដល់វ៉ាក់សាំងដ៏ធំមួយ ដល់ប្រជាជនរបស់ខ្លួន ។
ដ្បិតតែយ៉ាងនេះក្ដី ចំពោះវ៉ាក់សាំង Sinovac របស់ក្រុមហ៊ុនចិននេះ ត្រូវឆ្លងកាត់ការវាយតម្លៃពីអាជ្ញាធរមានសមត្ថកិច្ចរបស់ឥណ្ឌូនេស៊ីជាមុនសិន មុននឹងការដាក់ឲ្យប្រើប្រាស់ជាផ្លូវការ ។
អត្ថបទទាក់ទង!
យ៉ាងណាមិញ នៅថ្ងៃអង្គារសប្ដាហ៍នេះក្រុមហ៊ុនរដ្ឋឥណ្ឌូនេស៊ី Bio Farma បាននិយាយនៅក្នុងសេចក្ដីថ្លែងការណ៍ថា នៅក្នុងរបាយការណ៍បណ្ដោះអាសន្ន ដែលធ្វើការសាកល្បងក្នុងដំណាក់កាលទី៣ រំពឹងថា នឹងរួចរាល់នៅក្នុងខែមករាឆ្នាំក្រោយ។
មន្ត្រីជាន់ខ្ពស់ក្រុមហ៊ុន Bio Farma បានបញ្ជាក់ទៀតថា ប្រសិទ្ធភាពនៃថ្នាំវ៉ាក់សាំងការពារកូវីដ-១៩ មិនអាចបញ្ជាក់អះអាង ឬកំណត់បាននៅឡើយទេនៅពេលនេះ ហើយវាត្រូវការរង់ចាំដល់តែទិន្នន័យបានបញ្ចប់រួចរាល់ជាស្ថាពរសិន។
ក្រុមហ៊ុន Bio Farma បាននិយាយកាលពីថ្ងៃអង្គារសប្ដាហ៍មុនថា លទ្ធផលនៃការធ្វើតេស្ដសាកល្បងវ៉ាក់សាំងនេះ គឺបង្ហាញថា មានប្រសិទ្ធភាពដល់ទៅ ៩៧%។ ក្រុមហ៊ុន Sinovac Biotech ដែលផលិតវ៉ាក់សាំងនេះ ក៏បាននិយាយកាលពីខែមុននេះដែរថា វាមានប្រសិទ្ធភាព៩៧% លើមនុស្សពេញវ័យដែលមានសុខភាពល្អ បន្ទាប់ពីបានឆ្លងកាត់ការតេស្ដសាកល្បង២ដំណាក់កាលរួចមក។
កាលពីថ្ងៃអង្គារក្នុងសប្ដាហ៍នេះ អ្នកនាំពាក្យក្រុមហ៊ុន Sinovac បានបញ្ជាក់ថា ក្រុមហ៊ុនមិនទាន់បានទទួលរបាយការណ៍ដែលនិយាយពីប្រសិទ្ធភាពនៃការធ្វើតេស្ដសាកល្បងក្នុងដំណាក់កាលទី៣នៅឡើយទេ។
ទោះយ៉ាងណា ក្រុមហ៊ុនរដ្ឋឥណ្ឌូនេស៊ី Bio Farma បាននិយាយថា មិនមាននរណាម្នាក់ នៃអ្នកដែលបានស្ម័គ្រចិត្តទទួលការសាកល្បងការចាក់វ៉ាក់សាំងនេះ ជាង ១ពាន់៦០០នាក់ បង្ហាញពីផលប៉ះពាល់ធ្ងន់ធ្ងរ ក្រោយពីចាក់នោះទេ៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
