ក្រុមហ៊ុនកូរ៉េខាងត្បូង Samsung Electronics និងក្រុមហ៊ុន SK Hynix គឺជាក្រុមហ៊ុនផលិតបន្ទះឈីបអង្គចងចាំធំជាងគេទាំង២នៅលើពិភពលោក រីឯក្រុមហ៊ុន Micron របស់សហរដ្ឋអាមេរិកស្ថិតនៅលេខ៣។ ក្រុមហ៊ុនទាំង៣នេះបានធ្វើអាជីវកម្មយ៉ាងសកម្មនៅក្នុងប្រទេសចិន ទោះជាក្រុមហ៊ុនកូរ៉េខាងត្បូងទាំង២ មានផលិតកម្មធំជាងក្រុមហ៊ុនមីក្រុងនៅក្នុងប្រទេសនេះក៏ដោយ។
ទីក្រុងប៉េកាំងបានប្រកាសកាលពីថ្ងៃអាទិត្យ ទី២១ ខែឧសភាថា ក្រុមហ៊ុន មីក្រុង បានបរាជ័យក្នុងការត្រួតពិនិត្យសុវត្ថិភាព ដូច្នេះហើយប្រតិបត្តិករនៃហេដ្ឋារចនាសម្ព័ន្ធសំខាន់ៗត្រូវបានរារាំងមិនឱ្យទិញផលិតផលពីក្រុមហ៊ុននេះឡើយ។
ខណៈដែលក្រុមហ៊ុនមីក្រុងស្ថិតនៅក្រោមការត្រួតពិនិត្យជាច្រើនខែពីនិយតកររបស់ចិននោះ ក្រុមហ៊ុន Samsung និងក្រុមហ៊ុន SK Hynix បានយល់ឃើញថា ពួកគេហាក់ដូចជាត្រូវស្ថិតក្នុងគំនាបរបស់ប្រទេសមហាអំណាចទាំង២នេះ។ កាលពីខែមុន សហរដ្ឋអាមេរិកបានស្នើឱ្យទីក្រុងសេអ៊ូលជំរុញក្រុមហ៊ុនផលិតបន្ទះឈីបរបស់ខ្លួនកុំឱ្យបំពេញចន្លោះប្រហោងទីផ្សារដោយការលក់ផលិតផលទៅឱ្យប្រទេសចិនឡើយ ហើយចិនទំនងជាផ្ចាញ់តបវិញជាមួយការដាក់បម្រាមលើក្រុមហ៊ុន មីក្រុង ថ្មីៗនេះតែម្ដង។
អត្ថបទគួរអាន
ថ្វីបើមានភាពតានតឹងផ្នែកនយោបាយក៏ដោយ ក៏ក្រុមអ្នកវិភាគបានមើលឃើញឧបសគ្គរបស់ក្រុមហ៊ុន Micron ថា ជាឱកាសអាជីវកម្មដ៏ច្បាស់លាស់មួយសម្រាប់ក្រុមហ៊ុន Samsung និងក្រុមហ៊ុន SK Hynix។
លោក លី សៀង វូ (Lee Seung-woo) អ្នកវិភាគជាន់ខ្ពស់នៅក្រុមហ៊ុនផ្សារមូលប័ត្រ Eugene Investment & Securities បានប្រាប់សារព័ត៌មាន Nikkei Asia ថា ក្រុមហ៊ុនកូរ៉េទាំង២នេះអាចកាន់កាប់ចំណែកទីផ្សារបានច្រើនអាស្រ័យលើទំហំខាតបង់របស់ក្រុមហ៊ុនមីក្រុងក្នុងប្រទេសចិន។ នេះគឺជាផលវិជ្ជមានសម្រាប់ពួកគេ ហើយវាមិនច្បាស់ទេថាតើវានឹងមានចំនួនប៉ុន្មាននោះ ប៉ុន្តែវាពិតជាល្អសម្រាប់ពួកគេ។
លោក ម៉ាក លី (Mark Li) អ្នកវិភាគនៅក្រុមហ៊ុន Sanford C. Bernstein បាននិយាយថា នៅក្នុងសេណារីយ៉ូដ៏អាក្រក់បំផុត ក្រុមហ៊ុនមីក្រុងនឹងខាតបង់ប្រហែល ១១% នៃប្រាក់ចំណូលរបស់ខ្លួនដោយសារតែការហាមឃាត់នេះ។ ទោះជាយ៉ាងណាលោកបានបន្ថែមថា ផលប៉ះពាល់ដល់ប្រាក់ចំណូលរបស់ក្រុមហ៊ុនអាចនឹងច្រើនជាងនេះ។
លោក លី ក៏បានយល់ស្របដែរថា ប្រទេសចិនទំនងជានឹងខិតទៅរកការចរចាជាមួយក្រុមហ៊ុនកូរ៉េទាំង២នេះ ដើម្បីផ្គត់ផ្គង់បន្ទះឈីបអង្គចងចាំ ប៉ុន្តែលោកមិនទាន់ច្បាស់ថា តើក្រុមហ៊ុនទាំងនេះនឹងយល់ព្រមធ្វើការជាមួយចិនឬយ៉ាងណានោះទេ បន្ទាប់ពីមានការបន្ទុចបង្អាក់ពីសម្ព័ន្ធមិត្ត គឺសហរដ្ឋអាមេរិក៕
