នាយករដ្ឋមន្ត្រីថៃបញ្ជាឲ្យចាត់វិធានការទប់ស្កាត់លើការលក់ឧបករណ៍ធ្វើតេស្តរកកូវីដ១៩ខុសស្តង់ដារ

នាយករដ្ឋមន្ត្រីថៃ លោក ប្រាយុទ ចាន់អូចា បានលើកទឹកចិត្តដល់សាធារណជនទូទៅឱ្យជ្រើសរើសតែឧបករណ៍ធ្វើតេស្តរកមេរោគកូវីដ-១៩ ដែលត្រូវបានអនុញ្ញាតដោយរដ្ឋបាលចំណីអាហារ និងឱសថ (FDA) តែប៉ុណ្ណោះ។ លោកក៏បានបញ្ជាឱ្យក្រសួងសុខាភិបាល គ្រប់គ្រងគុណភាពឧបករណ៍ធ្វើតេស្តអង់ទីហ្សែន ដែលមានលក់នៅលើទីផ្សារ និងដាក់ទោសអ្នក ដែលលក់ឧបករណ៍ក្លែងក្លាយដែលគ្មានការទទួលស្គាល់ពីរអាជ្ញាធរសុខាភិបាលថៃ។

សូមជម្រាបថា នាពេលថ្មីៗនេះ នាយកដ្ឋានគាំទ្រសេវាសុខភាពបានស្នើឱ្យគ្រឹះស្ថានថែទាំសុខភាពទាំងអស់ក្នុងប្រទេសធ្វើការផ្ទៀងផ្ទាត់ប្រភពឧបករណ៍ និងវ៉ាក់សាំងដែលផ្តល់ដល់សាធារណជនទូទៅ។ 

តែយ៉ាងណាមិញ ប្រធានផ្នែកទំនាក់ទំនងនៃនាយកដ្ឋានគ្រប់គ្រងជំងឺ និងជាអ្នកនាំពាក្យរងនៃមជ្ឈមណ្ឌលគ្រប់គ្រងស្ថានការណ៍កូវីដ-១៩ បាននិយាយថា នាយកដ្ឋានកំពុងណែនាំអំពីការធ្វើតេស្តអង់ទីហ្សែន ចំពោះអ្នកមានហានិភ័យ ដែលបានប៉ះពាល់ជាមួយអ្នកឆ្លងជំងឺ និងអ្នកដែលមានរោគសញ្ញាគួរឱ្យសង្ស័យផងដែរ។ ទន្ទឹមនេះ ការធ្វើតេស្តតាមអង់ទីហ្សែន ត្រូវបានគេចាត់ទុកជាវិធានការបង្ការមួយដែលត្រូវបានអនុវត្តរួមជាមួយនឹងគោលការណ៍កំណត់គ្មានមេរោគកូវីដ១៩ ហើយការធ្វើតេស្តនេះអាចត្រូវបានធ្វើឡើងជារៀងរាល់សប្តាហ៍ ឬញឹកញាប់តាមតម្រូវការ។

សូមបញ្ជាក់ថា គិតត្រឹមថ្ងៃទី ១១ វិច្ឆិកានេះ ថៃបានកត់ត្រាចំនួនអ្នកឆ្លងថ្មីចំនួនជិត ៧ពាន់ ៥រយនាក់ ហើយអ្នកស្លាប់ថ្មីមាន ៥៧នាក់ ដែលធ្វើឱ្យចំនួនអ្នកឆ្លងសរុបក្នុងប្រទេសនេះកើនឡើងជិត ២លាននាក់ហើយ ខណៈចំនួនអ្នកស្លាប់សរុបជិត ២ម៉ឺននាក់៕